Mas libros, ye a guerra!
«Todas as guerras son guerras entre furtadors masiau covardes pa luitar, que inducen a os chovens varons de tot o mundo a fer la luita por ellos.»
«Mientras tres anyos y meyo enguilié a guerra tanto como podié. (…) Usé toz os medios posibles pa que no m’apegasen un tiro y no apegar-lo, no usé os piors d’os medios. Pero yo habría feito servir toz os medios, toz sin excepción, si m’hesen forzau a fer bella cosa asinas.»
A guerra nos trascruza y determina o nuestro present. A invasión rusa d’Ucraína y a guerra civilizadora «occidental» que s’ha desencadenau como respuesta han feito mas fuerte a o capitalismo y han provocau una nueva crisi a libel planetario. Una menaza letal se cierne sobre os dreitos humanos, as conquiestas socials y os ecosistemas en os cinco continents. Cosa d’isto ye accidental, responde a una lochica clasica de partición d’o mundo entre potencias militars que abanza en un río rechirau d’elites corruptas, mercaders d’armas, extractivistas, oligarcas y etnonacionalistas. Ye a guerra d’o capitalismo global.
Baixaz as armas, puyaz os salarios!
O gubierno espanyol fabla de paz mientras aviva a escalada belica y militariza a nuestra economía. Pero cuan proclaman que a guerra ye o solo camín, en realidat son decindo: o negocio ye o primero. A guerra ubre nuevas oportunidaz lucrativas pa beneficio exclusivo d’as grans corporacions. D’iste modo a economía global queda supeditada a las industrias de guerra, a la producción armamentistica, de vichilancia tecnolochica de buegas y control de recursos naturals cada vegada mas escasos (petrolio, augua, tierra y minerals estratechicos) que causoron o 40% d’as guerras d’os zaguers sixanta anyos.
Fondos d’inversión y conglomeraus bancarios, interpresas enercheticas y fabricants d’armamento cullen os suyos millors anyos en bolsa y aconsiguen beneficios nunca no vistos en a historia. Ganancias que aumentan, igual como a inversión militar en Europa y EUA, en a mida que a guerra s’alonga.
O discurso de ninviar armas ta Ucraína y de ganar a guerra por medio d’una victoria imposible, fendo de menos midas de dialogo y negociación y a qui las desfendemos, prioriza l’enriquimiento criminal d’una minoría y chuga con o destín y a supervivencia d’a población ucrainiana.
Amás, enamplar o gasto militar en os nuestros países no sería posible sin rebaixar encara mas os nuestros dreitos socials. De cada 10 euros que va a invertir o Reino d’Espanya en 2023, tres serán pa pistolas, tanques, bombas y cazas de combate. A mas guerra mas sacrificios salarials, en as pensions, en a educación u a sanidat publicas. A guerra dispara os pres d’a cesta d’a compra y a enerchía, puya hipotecas y alquilers, prevoca mas desafucios… A guerra empobreix, alonga y enampla l’uso de combustibles fosils, en especial gas, que nomás sirven que pa agudizar a crisi climatica que ha meso en xaque a la humanidat.
Con yo u contra yo
A economía de guerra ameneste de mentes militarizadas, d’enemigos pa existir, a suya construcción y prochección ye prioritaria. A consigna de rearmar a o Estau ucrainián y a la OTAN que vocian a mayoría de medios y mandatarios pa convencer-nos d’alongar a matacía, responde a ixa lochica binaria d’o totalitarismo que ameneste de buenos y malos, d’amigos y enemigos pa resolver as disputas y sozmeter as protestas socials. Ye a viella retorica de fer a guerra dica a victoria final. A fascinación por fer mal, por estricallar y redotar, acompanya a exhibición incesant de maquinas de muerte a truco de parte de noticias y a propaganda d’os partes de baralla. Ye a naturalización d’a violencia y a suya trachedia, o plantero d’o fascismo, a negación d’a cultura mesma. “Entre morir y matar bi ha una tercera posibilidat: vivir”, escribió Christa Wolf en o suyo libro Casandra.
A disyuntiva militarista de matar u morir se resuelve clamando a la vida
No queremos malvivir entre as suyas trincheras, ni emparar o patriotismo nacional u o supremacismo imperialista d’un u unatro bando. No seremos complices d’a suya carnecería y a suya allerada. Nos negamos a cualsequier forma de colaboración con ista inchusticia y nos declaramos librerías, editorials y bibliotecas insozmesas a la guerra y a militarización social. Queremos transformar a nuestra dolor y a nuestra impotencia en acción, estar parte responsable d’un cambio cultural que contribuiga a la eliminación d’as causas que provocan as guerras y a la erradicación d’a violencia, y a suya mercantilización, como forma de relación entre as personas y os pueblos: tot y con toz os obstaclos, d’a censura que silencia, invisibiliza u criminaliza cualsequier oposición. Nos comprometemos a compartir actividaz y difundir toz aquels libros que pueden aduyar a desmilitarizar o nuestro pensamiento pa animar-nos a desertar d’a barbarie.
Sentimos que a nuestra responsabilidat cultural ye ubrir linias de fuga pa desaprender a guerra y desfender o dreito a la critica, a la disidencia y a una información rigorosa, veraz y independient.
Acubillamos sieglos de pachinas escritas contra a guerra. No nos espanta a ulor d’as viellas fogueras de qui pedrican odio y mas guerra. Queremos estar cubilar y chilo de conoixencia, de dialogo, cooperación y emparo mutuo. Por o futuro d’a humanidat. Y por a planeta. Saliz d’as nuestras vidas!
A guerra y os suyos malfeitors nos acazan, no bi ha tiempo que perder… Mantenir viva una cultura de paz y chusticia social ye un quefer colectivo. Clamamos a la cooperación y a l’emparo mutuo pa aconseguir-lo a traviés d’ista iniciativa independient de Libros contra a guerra. Mas libros, ye a guerra!
- Clamamos a emparar a la deserción y a obchección de consciencia en Ucraína, Rusia y Belarrusia, y a participar en os movimientos de resistencia a la guerra a traviés d’a campanya internacional #ObjectWarCampaign
- Exichimos que se paralice o ninvío d’armamento a Ucraína. Y que o gasto militar espanyol asignau a o conflicto ucrainián s’endrece a las organizacions independients que treballan sobre o terreno, atendendo a victimas d’ista y atras guerras.
- Que se potencien politicas europeas de negociación, conciliación y convivencia entre as poblacions enfrontinadas, y que o presupuesto militar europeu se destine a la reconstrucción d’Ucraína sin coste pa la sociedat ucrainiana ni negocio pa las multinacionals occidentals.